Rev 12 | KYG | STEP | Mago'e huno lusi kava huno no'agaya aune kava'mo koku'nate afole ai'niyana mago a kanomo agufale'mo yegegana agufa kukena vaili'nigeno aiyafi'mo kaimo hane'nigeno kakolita'amo ae'a apakase'naya vaya'mogi ali'a ne'malaya agufa kakolitamo tuolofu'a kanefi'mo'a faino ku aino ate'nigeno kanefi kakolitamo agenopale'mo hane'niye.

Revelation of John 12

A kano'e alopa nagalo'yave'efe'mo anava gemo hu'niya gemae

1 Mago'e huno lusi kava huno no'agaya aune kava'mo koku'nate afole ai'niyana mago a kanomo agufale'mo yegegana agufa kukena vaili'nigeno aiyafi'mo kaimo hane'nigeno kakolita'amo ae'a apakase'naya vaya'mogi ali'a ne'malaya agufa kakolitamo tuolofu'a kanefi'mo'a faino ku aino ate'nigeno kanefi kakolitamo agenopale'mo hane'niye. 2 Aipagu'e'mo mai'neno mafa'nemo alino atesiyafe'mo mai'nigeno agafu ki'nigeno'ae'mo lusi kava huno yulagefa ai'niye. 3 Inagi mago alu no'agaya aune kava'mo koku'nate afole ai'niyana alopa haesa nagalo'yavemo'mo seveni'a agenopamo hane'nigeno naya lole'a lokiya'amo hane'nigeno agenopale'mo seveni'a kakolitamo ala kini vaya'mogi ne'malaya agufa kakolitamo hane'niye. 4 Aigo'yaleti'mo koku'nateti'mo lole'e mago'e kanefipati'mo magokayaga atupalega kanefi'mo aino atafaino mopafi'mo yaga auno atale'niye. Alopa nagalo'yavemo'mo mafa'nemo alino ategefe hu'niya a kanomo aulagale'mo he tino mai'neno'ae'mo mafa'nemo alino ne'atesigeno'ae'mo haeno nesiyafe'mo he tino mai'niye. 5 Ani a kanomo'mo ve mafa'nemo alino ate'nigeno muki alu kotega alu kotegamo mai'naya vaya'aite'mo aeni kayoteti'mo yagaino apatesiya mafa'nemo alino ate'nigeno'ae'mo Goti'a a kanomo mafa'ne'amo ha faleno avalelino haino agaetegamo yagaino ne'apateya sia'ale'mo ate'niye. 6 Ani a kanomo Goti'a ka'me ko'mo mago alo huno ate'niya kotegamo vani tauseni tu hataleti sigisiti'a afina'mo ha maeno yagaino atesiyafe'mo ka'me kotegamo aune heno u'niye.

7 Utege'apae'mo koku'napi'mo kamemo hu'nae. Maiko'agi yagaino ne'apateya enisole vaya'agi hu'a nagalo'yave'e'mo kame hu'nae. Kame hute'apae'mo nagalo'yavemo'mo yagaino ne'apateya enisole vaya'amogi'e apakae'e'mo kame hu'naya'monanafa 8 Maiko'agi yagaino ne'apateya enisole vaya'agi hu'a kame hute'a hu'a ae'a apakase'nage'a koku'napi'mo mago'e hu'a o'mai'nae. 9 Ali'a hapa fai'a apatalete'a alopa nagalo'yavemo akeya'vilaga mai'niya nagalo'yavemo'mo aigofe ge'aleti'mo muki ma mopafi vaya'mo apakesamo nefaiya nagalo'yavemo ali'a hafai'a atale'nageno ma mopafi'mo asagauno ai'niye. Mago agi'amo Nevo'ae ani agimo aepa'amo hane'niyana huno faipa huno ne'apateya vekae. Mago agi'amo Satani'ae ani agimo aepa'amo hane'niyana kame vekae. Apakaemo agae'e enisole vaya'a'e'mo ali'a hapafai'a apatale'nage'a ma mopafi'mo asagau'a ai'nae.

10 Ali'a hapafai'a apatale'nage'nae'mo afuvana koku'napati'mo alopa gefati'mo ge hu'apae'mo, Goti aulagale'mo feluga'e hani'ilaga'e'mo he ti'neno konagatimogife'mo huno faipa huno ne'apateya vekamo koku'napati'mo ago ali'a hafai'a atale'naya'mofe'mo hemenimo Goti'a vaya'amogi apakufamo alino katino apatege ala kini vekamo himamu'aleti'mo huge Gotitimo'a yagaino apatege lekana paino ate'niya Kalaisi ne'amo himamu'amo afole aige huno afole aigiye. 11 Konagatimogimo aikeli sipisipimo kola'aleti'mo lama ge'amo ae'a hakalo hu'a hapa pai'naya ge'aleti'mo ae'a agase'nae. Apakaemo apakai'api apakufae'mo apakesamo o'afi'a afa'a faligune, hu'a hu'nae. 12 Hu'naya'mofe'mo koku'na'e koku'napi mai'naya vaya'mogitapa'e'mo lapamogaga aiyo. Nevo'mo ma mopafi'e solovala anite'e'mo mai'naya vaya'aitegamo ago lami'niya'mofe'mo lapakaefe'mo vaehae, huta nehune. Agai'a afinafe'mo aise afina'mo hane'niye, huno agesamo afi'niya'mofe'mo lusi kava huno aipamo nele, hu'a hu'nae.

13 Nagalo'yavemo ali'a hafai'a ma mopafi'mo atale'nageno'ae'mo ago ali'a nahafai'a natale'nae, huno ageteno'ae'mo mafa'nemo alino ate'niya a kanomo kilino vegala ae'niye. 14 A kanomo uno ka'me kotegamo maisiyafe'mo alo huno ate'niya kotegamo halelino visiyafe'mo lole hakula'mo alopa namamo hilomo hakumo alino ami'nigeno ali'niye. Nagalo'yavemo'mo ohaesiyafe'mo lole'e mago'e kafugafi'e atupa kafugafi'e'mo yagaino atesigeno alagepa huno maisiya kotegamo halelino visiyafe'mo hakumo alino ami'niye. 15 Hakumo ali'nigeno'ae'mo nagalo'yavemo'a ani'mo alinino visiyafe'mo avayafati'mo alopa anikefamo nelamiya anikana huno aeno apakaeno atale'niye. 16 Ani'mo aeno apakaeno atale'niya'monanafa mopamo'mo a kanomo ha maesiyafe'mo avayamo aka hu'neno ani'mo alino nakai'niye. 17 Nagalo'yavemo'mo a kanoe'mo lusi kava huno aipamo leno ateteno a kanomo mafa'ne'amogimo Goti ge'amo akame hute'a Yesu'mo alino apave li'niya gemo o'atale'a atafau'a alagi nehaya vaya'aitegamo kame huno apatesiyafe'mo u'niye.